ہم سوچنے لگتے ہیں کہ خدانخواستہ خدا ہے بھی کہ نہیں جو اوپر بیٹھا غریب مسلمانوں کی تباہی اپنی آنکھوں سے دیکھ رہا ہے اور کچھ بھی نہیں کر رہا۔

محترم افضل صاحب!
خدا ہے ۔ بالکل ہے۔ اور ہمشہ رہے گا۔ خدا کی ایک صفت بے نیازی بھی ہے۔
ہمارے اپنے کرتوت صحیح نہیں ہیں۔ اللہ میاں جب کسی چیز کا فیصلہ کرتے ہیں۔ تو وہ ہو جاتاہے۔ جس طرح کے ہماری پوری قوم کے کرتوت ہیں۔ ایسے میں اللہ میاں نے ہمیں کیوں چھوڑ رکھا ہے۔ غریبی اور اور امن عامہ سے بھی بڑھ کر بہت برے عذاب ہیں ۔ اللہ میاں خوفناک عذاب ابھی ہم پہ مسلظ نہیں کررہے۔ تو اس کی بھی شاید یہ وجہ ہے کہ ابھی خدا ہم سے مایوس نہیں ہوا۔

قائدِ اعظم کی زندگی کے آخری ایام میں ہی پاکستان کی حکومت اور اداروں پہ ناجائز طور پہ قابض ہونے کی گھناؤنی سازشیں شروع ہو گئیں تھیں۔ نتیجے میں جو عیار اور پاکستان کاز سے غدار ۔ اسلام سے بیزار لوگ پاکستانی حکومت اور ملکی اداروں پہ قابض ہوئے انہوں نے، پاکستانی قوم کی پاکستانی جذباتیت۔ اسلام سے والہانہ لگاؤ اور علم سے بے بہرہ ہونے کا خوب خوب فائدہ اٹھایا۔ حکمران اور ان کے درباری ، چمچے چیلے۔ رات کو بلیک ڈاگ کی بوتل کھول کر پیتے اور دن کو پاکستانی عوام کو خلفائے راشدین کے واقعات سناتے۔ آیات اور احادیث مبارکہ کے حوالے دیتے اور پاکستان کو قرون اولٰی کے دور کی خوشحال اور فلاحی ریاست بنانے کی زبانی جمع تفریق کرتے۔ ایسے ایسے سہانے خواب دکھائے جو کسی بھی طرح پورے ہونے ممکن نہ تھے ۔ عوام آنکھیں بند کر کے زندہ باد ۔ پائندہ باد کے نعرے لگاتے رہے۔

جرنیلوں نے دیکھا جب پوری قوم ہی بے وقوف بن گئی ہے۔ کوئی احتجاج کرنے والا نہیں۔ کسی کو شکائت نہیں۔ کوئی دردِسر نہیں۔ سب اچھا ہی اچھا ہے۔ تو جرنیل آگے بڑھے۔ نام نہاد قائدین کی تختی بجائی۔ انھیں چلتا کیا اور اقتدار کی سدا بہار دوشیزہِ حسنِ دو آتشہ کو اپنے حجلہ عروسی میں لا بٹھایا۔ بوتلیں کُھلنے لگیں۔ جشن برپا ہونے لگے۔ عوام کے لئیے نئے نعرے تیار کیئے گئے۔ عوام کو نئے سرے سے زندہ باد تابندہ باد کے پرانے نغموں کے ساتھ ساتھ جذبہِ حب الوطنی سے سرشار کیا گیا ا۔ پاکستان کی طرف ٹیڑھی آنکھ سے دیکھنے والوں کو آنکھیں پھوڑنے جیسے نعرے دئیے گئے ۔ عوام نئے خداؤں پہ یقین لے آئیں۔ اس کے لئیے بھارت سے چھیڑ چھاڑ شروع کر دی۔ ایک دفعہ پھر زندہ باد پائیندہ باد اور تابندہ باد جیسے نعروں کی گونج میں جرنیلوں نے پاکستان کی بنیادیں کھودنی جاری رکھیں۔ نعرے بڑھتے گئے۔ پاکستان سکڑتا گیا۔ جری جرنیل اور بہادر افواج کی ڈرل مشقیں بڑھتی گئیں عوام کے پیٹ کمر سے لگتے گئے۔ جوں جوں فوج کا بجت بڑھتا گیا۔سرزمیں مملکتِ خداد سکڑتی گئی۔ آدھے پاکستان کو ۔۔سابقہ۔۔(مشرقی پاکستان) قرار دے دیا گیا۔

آسمان نے یہ ستم ظریفی بھی دیکھی ۔ پاکستان فوجی مارشل لاء ایڈمنسٹریٹروں سے ہوتا ہوا سول مارشل لاء ایڈمنسٹریٹر کے قبضے میں آگیا۔پھر سے زند باد اور پائیندہ باد کی گونج میں، نئے نعرے تخلیق ہوئے۔ اسلامی سوشلزم ایجاد کیا گیا۔ دن بدن فقیر ہوتے عوام کے لئیے روٹی کپڑے اور مکان کا پرکشش نعرہ سوچا گیا۔ عوام کے نعرے بڑھتے گئے۔ اور پیٹ مزید سکڑتے گئے۔

اردو ادب کے افسانوی محبوب کے نازو انداز اور عشوہ طرازیوں میں اتنا جادو۔ اتنی کشش نہیں جتنی کشش ہمارے جری جرنیلوں کے لئیے پاکستانی اقتدار کی بے زبان بیسوا میں ہے۔ ایک جرنیل کو اچانک سوجھی کہ پاکستان کو مسلمان کیا جائے ۔ بس پھر کیا تھا آناً فاناً مرد مومن ، اسلام کا سپاھی مونچھوں کو بل دیتا آن دہمکا اور پقوری قوم کو لگاتار ایک دہائی سے اوپر ٹکٹکی پہ لٹکائے رکھا۔ اسلامی جرنیل سے لیکر۔ ننگ ملت روشن خیال جرنیل تک سادہ لوح قوم گلاے پھاڑ پھاڑ کر ۔ پوری آب و تاب سے ہر بلند بانگ دعوے پہ زندہ باد پائیدہ باد اور روشن خیالی کے فلک شگاف نعرے لگاتی رہی ۔ اسلام سے پھر روشن خیالی کے اس سفر میں۔ پاکستان میں پیدا ہونے والے بچوں پر قرضہ چڑھتا گیا۔ روشن خیال جرنیل نے اپنی لاڈلی ق لیگ کی ہمراہی میں پاکستان کو فائر لائن پہ کھڑا کر کے۔ پوری قوم سے یہ کہہ کر داد تحسین وصول کی کہ ملک کے عظیم تر قومی مفاد میں پاکستان بچا لیا گیا۔

ملک کا ایک سو پچاس ارب روپیہ لوٹنے والے ۔ این آر او کا منافاقانہ نام اپنا کر نہ صرف اپنے گناہ بخشوا آئے بلکہ این آر او کے پیٹ سے جنم لینے کے بعد معصوم اور عزت مآب قرار دئیے گے۔ نا صرف معصوم قرار دئیے گیے بلکہ قوم کو الٹا لٹکا کر قوم کے بادشاہ بنائے گئے ۔ بادشاہ گروں (امریکہ) نے اقتدار کی بیسوا کے مزے لوٹنے کے باقی ماندہ امیدواروں کو کچھ ایسی ٹیرھی آنکھ سے دیکھا ۔ کہ وہ بجائے اپنے اندر اس شیطانی آنکھ کو ہمیشہ کے لئیے پھوڑنے کی ہمت پانے کے( کہ پاکستان پھر سے آزاد ہوجائے قدرت ایسے موقعے بہت کم خوش نصیو ں کو دیتی ہے) وہ اقتدار کی غمزہ اندازیوں سے منہ موڑے متواتر ۔۔ نہیں ، نہیں۔۔ کی گرادن کئیے جاریے ہیں ۔ بادشاہ ہر روز دہشت گردی کے خلاف جنگ جاری رکھنے کے ایک اعلان کے بعد ناشتہ کرتے ہیں ۔ سونے سے پہلے روز کی جنگ میں مارے گئے دہشت گردوں کی تعداد بیان کی جاتی ہے ۔ قوم کو شیطان کی آنت کی طرح لمبی جنگ جاری رکھنے کا جان افزاء مثردہ سنایا جاتا ہے ۔ عالمی دورے جاری ہیں ۔ دادِ تحسین وصول کی جارہی ہے۔ پاکستان کو گروی رکھ کے لمبے سود پہ امداد و خیرات کا کاروبار جاری ہے۔ ہر دورے میں سوات آپریشین کی وجہ سے خوار ہوتے عوام کی امداد کے لئیے ، دال ساگ۔ گوشت ، چاول ۔ الغرض نقد ادہار سب جائز کے طور پہ منہ کھول کر باآوازِ بلند، نہائیت خوش الحانی کے ساتھ امداد امداد گایا جاتا ہے ۔ اگر وزیر شزیر بھی ساتھ ہوں تو کورس گیت کا شائبہ ہوتا ہے۔ کسی کی بہن یا بیٹی کو کوئی اٹھا لے جائے ۔ اغواء کر لے تو پولیس کی روزی روٹی شروع ہوجاتی ہے۔ اسی طرح اللہ نہ کرے اگر پاکستان پہ کوئی مصیبت آجائے تو سرکار دربار اور بادشاہوں کے وارے نیارے ہو جاتے ہیں ۔ لوگ خوار ہورہے ہیں سخت گرمی میں بنجر اور بے آب و گیا زمینوں پہ پڑے ہیں ۔ مگر امداد ہے کہ ان تک پہنچ کے ہی نہیں پا رہی ۔

بجلی ۔ پانی روٹی۔ روزی۔ بے روزگاری۔ غربت افلاس ۔ مستقبل کی منصوبہ بندیاں ۔ اسکول ۔ کالج۔ یونیورسٹیز۔ اپنے جان مال اور ناموس کی حفاظت۔ سڑکیں۔ گلیاں۔ اھسپتال۔ فیکٹریاں ۔ ملیں یہ سارے اور دیگر سیاپے عوام کے ہیں ۔ ہمارے بادشاہوں کو نہ انکی ضرورت ہے نہ انھیں پاکستان کے عوام کے سردرد سے واسطہ ہے ۔ وہ تو ٹہرے عالمی شہری ۔ مشرف کی طرح لنڈن کے مہنگے علاقوں کے مکیں ۔ اربوں روپوؤں کے محلوں کے باسی۔ بھولے عوام ۔ نعرے لگاتے عوام بھوکی ننگی اور مفلوک الحال رعایا ۔ ہمارے بادشاہوں کی ذمہ داری نہیں۔ یہ بادشاہ جہاں سے برآمد کئیے جاتے ہیں۔ وہیں چلے جاتے ہیں۔ سابقہ اور موجودہ بادشاہوں کے اللوں تللوں کے لئیے، عالمی مہاجنوں سے بھاری سود سےامداد اور خیرات کے نام پہ لیا گیا قرضہ ۔ جسے بمع سود چکانے کے لئیے ۔آنے والی کئی نسلیں بیگار کاٹیں گی۔ یہ قرضہ یہ ادھار یہ سود ۔ اسکا حساب کتاب اور حساب کتاب رکھنے والے ادارے ہمارے بادشاہوں کے ساتھ بادشاہ گروں (امریکہ ۔ برطانیہ وغیرہ) کے گھر نہیں جائے گیں ۔ کیونکہ پاکستان کو ایک کارپوریشن سمجھا جاتا ہے جس پہ جتنا بھی قرضہ لو ۔ اتارنا تو کارپوریشن نے ہوتا ہے۔ عوام آج بھی زندہ بار ۔ پائیندہ باد کے نعرے لگا رہے ہیں ۔ خواہ انکے پیٹ کمر سے لگ کر سوکھ کیوں نہیں گئے۔

اور آپ کہتے ہیں کہ خدانخواستہ ہمارے ملک کا خدا ہی کوئی نہیں، خدا کی ایک صفت بے نیازی بھی ہے

” مالی سال 2009-10کے بجٹ میں بے نظیر انکم سپورٹ پروگرام کے لئے 70 ارب روپے رکھے گئے ہیں۔ بقول وفاقی وزیر مملکت برائے اقتصادی امور حنا ربانی کھر ، بے نظیر انکم سپورٹ پروگرام کے ذریعہ انتہائی غریب طبقہ کو ماہانہ ایک ہزار روپے دیئے گئے جبکہ اس مالی سال کے دوران اس پروگرام کے لیے 70 ارب روپے رکھے گئے ہیں۔ اور آئندہ مالی سال کے دوران اس پروگرام کے لئے 70 ارب روپے کی تجویز ہے تاکہ اس کا دائرہ کار 50 لاکھ خاندانوں تک بڑھایا جاسکے۔”

اسقدر مہنگائی میں ایک پورے خاندان کو صرف ایک ہزار ماہانہ دینے سے ۔ سے انکی کونسی غربت دور ہوگی؟۔ یہ قوم کا پیسہ ہے جو پاکستان حکومت کے نام سے نہیں بلکہ اپنی پارٹی کی رہنماء کے نام پہ مستحق لوگوں کو دیا جائے گا۔ کیا اس سے غریبی کم ہو جائے گی ؟۔ کیا اسطرح بے نظیر انکم سپورٹ پروگرام سے لو گ اپنی غریبی ختم کرنے پر اگلے سال یہ ایک ہزار ماہا نہ لینا لینا چھوڑ دیں گے؟۔ کیا سالانہ 70 ارب روپے سے ملک میں بے شمار صنعتیں نہیں لگائی جاسکتیں ۔ یوں ہر سال کے 70 اربے روپے سے چند سالوں میں پچاس لاکھ نادار خاندانوں کو ان لاتعداد صنعتوں کا مالک جانتے ہوئے ۔ صنعتوں کے کمائی سے ۔ منافع سے ماہانہ کئی ھزار روپے نہیں دئیے جاسکتے۔؟ جس سے ملک میں روزگار بھی بڑھتا۔ تو پھر ذہنوں میں ایک سوال اٹھتا ہے کہ پھر ایسا کیوں کیا جارہا ہے۔؟ اسکے پیچھے جہاں اور بھی عالمی محرکات ہیں کہ پاکستان ترقی نہ کر جائے ۔ وہیں پاکستان کے پچاس لاکھ خاندانوں کے غریب نادار اور لازمی طور پہ انپڑھ افراد کے لئیے جن میں کم از کم اگر ایک بھی بالغ فرد ہوا ۔ جبکہ غالب امکان ایک سے زیادہ بالغ مرد عورتیں ہونگی۔ تو یہ پچاس لاکھ کی بجائے ایک کروڑ ووٹر آئیندہ الیکشن میں پکے بینظیر پارٹی کے ہوئے ۔ ظاہر ہے جب ہزار روپیہ ماہانہ لینے والوں کو سارا سال یہ رٹہ لگوایا جائے ۔ کہ انھیں مدد دینے والا پاکستان کا قومی خزانہ نہیں بلکہ بینظیر بھٹو کا انکم سپورٹ پروگرام ہے ۔ تو پھر ووٹ کسے پڑیں گے ۔؟

ایں جی۔۔ کچھ آپ بھی اپنے ذہنوں پہ زور ڈال لیں۔
ہماری جوتیاں ، ہماراسر

نوٹ۔ یہ تبصرہ میں نے مسٹر کنفیوز کے بلاگ پہ بھی کیا ہے۔ موضوع کی مناسبت سے یہاں بھی لکھ دیا ہے۔

آپ بلاگر حضرات سے ایک شکوہ بھی ہے کہ آپ لوگوں نے ایک بھی پوسٹ ان شہدا کے لیئے نہیں لکھی جو پاک فوج کے سپاہی اور پولس اور رینجرز اور دیگر سیکیورٹی فورسس کے لوگ تھے جو اپنا آج ہمارے کل کے لیئے قربان کررہے ہیں ہمارے سیاست دانوں کی بوئی ہوئی فصلیں کاٹنے میں اپنے بچوں کو یتیم اور بیویوں کو بیوہ کر کے جا رہے ہیں، کیا ہم واقعی ایک احسان فراموش اور بے حس قوم بن چکے ہیں؟:(